“Uzbekistan Airways” компаниясининг Жанубий Корея пойтахти Сеулдан 10 май куни учган инсонпарварлик ёрдами ортилмиш чартер самолёти Тошкентга етиб келди. Учоқ бортида, “Дунё” ахборот агентлиги хабарига кўра, умумий қиймати 192 минг долларга яқин ёрдам юки бўлган.
Қимматли юк таркибига автоматик бошқариладиган кўп функцияли тиббий каравотлар, антисептик ва дезинфекция воситалари, тиббий ниқоблар, инсон иммун тизимини мустаҳкамлашга хизмат қиладиган озуқавий қўшимчалар киритилгани қайд этилмоқда.
Инсонпарварлик ёрдами Жанубий Кореянинг “BOMI Engineering”, “LH Corporation”, “Evergreen Motors”, “Infinity Co., Ltd.” компаниялари, Шинхан университети ҳамда ушбу мамлакатда вақтинча меҳнат фаолиятини олиб бораётган ватандошлар ва ўзбекистонлик талабалар томонидан тақдим этилган.
Аввалроқ Жанубий Корея Тошкентга умумий қиймати 1 миллион долларга тенг тиббий воситалар билан махсус учоқ йўллагани ҳақида хабар қилгандик.