Париж яқинида 16 май куни Руандада 1994 йилда тутси халқи геноцид қилинишига асосий айбдорлардан бири сифатида кўрилувчи Фелисьен Кабуга қўлга олинди. Маълум бўлишича, 20 йил халқаро қидирувда бўлган Кабуга Париж атрофида сохта ҳужжатлар асосида яшаб келган. Франция полицияси 84 ёшли Кабугани қўлга олиш амалиётини махфий равишда ўтказди.
Кабуга тутси халқини қирғин қилишга чақирган “Минг адирликларнинг эркин радио ва телевиденияси” раҳбари бўлган. У жангариларга қурол сотиб олиш учун маблағ йиққан Миллий мудофаа фондини бошқарган.
1994 йилда Кабуга Швейцарияда яширинишга ҳаракат қилган. Аммо у Конго демократик республикасига экстрадиция қилинган. 1997 йилда эса уни Кения пойтахти Найробида кўришган. Бу ерда уни икки марта қўлга олишга ҳаракат қилишган. Бироқ бу ҳаракатлар самарасиз якунланган.
Кабуга Ҳаагага экстрадиция қилинади. Руанда бўйича халқаро трибунал ўз фаолиятини 2015 йилда ёпгани муносабати билан Кабуга иши халқаро трибуналларнинг якунланмаган қисми механизми асосида кўриб чиқилади.
БМТ маълумотида қайд этилишича, Руандада 800 мингдан 1 миллионгача бўлган одам геноцид қилинган. Бу мамлакат аҳолисининг бешдан бир қисмини ташкил этган.