Қирғизистон Ички ишлар вазирлиги “Катта ғазовот” (“Чон Казат”) ҳаракати фаолларининг чиқишларида жиноят аломатлари бор ёки йўқлигини текшириш мақсадида тегишли экспертизаларни ўтказмоқда. Бу ҳақда ички ишлар вазири ўринбосари Алмаз Ўрўзалиев парламентда 20 май куни ўтган йиғилишда маълум қилди.
Расмийга кўра, ҳаракат аъзоларидан бири Сиймиқ Жапикеевга нисбатан судгача суриштирув ишлари олиб борилмоқда. Иқтисодий жиноятларга қарши кураш хизмати эса собиқ Бош вазир, парламент депутати Қубаничбек Жумалиевнинг бойликлари қандай йўллар билан топилгани юзасидан дастлабки суриштирув ишларини олиб бормоқда.
“Катта ғазовот” ҳаракати ҳақида Қирғизистонда бир неча кун аввал маълум бўлди. Мазкур ҳаракат аъзоси ва Бош прокуратуранинг собиқ ходими эканини айтиб чиққан Сиймиқ Жапикеев исмли шахс ижтимоий тармоқларда Қирғизистондаги бир қатор сиёсатчилар, жумладан, собиқ Бош вазир ва амалдаги депутат Қубаничбек Жумалиев ўз бойлигини ноқнуний йўллар билан топгани иддао қилинган видеоларни жойлаштирган эди.
Бу видеолар қирғиз жамиятида қизғин муҳокамаларга сабаб бўлди. Қубаничбек Жумалиев эса маҳаллий телеканаллардан бирида қилган чиқишида, қўлига Қуръон ушлаб, коррупцияга аралашмагани тўғрисида қасам ичган.
Парламент депутати Ирина Карамушкина фикрича, “Катта ғазовот” ҳаракати “одамларни талаб бойиган талончиларни, контрабандистларни, коррупционерларни, бойлигини ҳалол йўл билан топмаганларни талашга чақирмоқда”.
Карамушкина ҳуқуқ-тартибот идоралари олдига “ҳаракат аъзоларининг бу каби чақириқлари “зўравонлик” деб баҳоланиши мумкинми?” деган савол қўйган эди.