АҚШда оқ танли полициячи томонидан ўлдирилган афроамерикалик Жорж Флойд хотирасига 8 июнь куни Техас штатининг Ҳюстон шаҳрида ибодат маросими ўтказилади.
7 июнь куни полиция бошлиғи Арт Асеведо Флойднинг жасади она шаҳри Ҳюстонга олиб келинганини билдирган эди. Флойдни дафн этиш маросими 9 июнда Ҳюстон яқинидаги Пирлендда ўтказилади.
Собиқ вице -президент Жо Байден Ҳюстонга келиши ва Флойд оиласига таъзия изҳор қилиши кутилмоқда.
46 ёшли Флойд Миннеаполис шаҳрида 25 май куни оқ танли полициячи Дерек Шовен томонидан қўлга олиниш пайтида бўғиб қўйилган эди. Флойд касалхонада вафот этган. Ўша куни унинг ўлими Миннеаполисда бошланиб, кейинроқ АҚШнинг барча шаҳарларида тартибсизликларга айланиб кетган намойишларнинг бошланишига сабаб бўлган.
Ирқчиликка қарши намойишлар АҚШдан ташқари дунёнинг кўплаб давлатларида ҳам ўтказилди.
Полициячи Дерек Шовен устидан суд 8 июнь куни бошланиши кутилмоқда. У ва унинг яна уч шериги қотиллик ҳамда қотилликда иштирок этишда айбланмоқда.