Янги Зеландияда коронавирусга чалинган бирор киши қолмади. Сўнгги бемор куни кеча соғайган, деб эълон қилинди. Бу мамлакатда сўнгги икки ҳафта ичида инфекция юқтириб олиш билан боғлиқ биронта ҳам ҳолат қайд этилган эмас.
8 июндан Янги Зеландия эпидемия билан боғлиқ барча чекловларни бекор қилди. Бу ўрин фақат биргина истисно бор – чегаралар ҳозирча ёпиқ қолмоқда.
Мамлакатда карантин тартиби 25 мартдан жорий этилган, апрель ойи охиридан эса аста-cекинлик билан чекловларни бекор қилиш бошланган.
Янги Зеландияда коронавирус юқтириб олиш билан боғлиқ жами 1504 та ҳолат қайд этилган. Вирус важидан 22 киши оламдан ўтган. Хасталар орасида ўлим ҳолати 2 фоиздан камроқни ташкил қилган, бу эса дунёдаги ўртача кўрсаткичдан анча пастдир. COVID-19 га чалинганларнинг қолган ҳаммаси соғайиб кетган.
Шу тариқа Янги Зеландия коронавирусдан фориғ бўлган йирик мамлакатлардан бирига айланди. Европада Черногорияда эпидемия тугагани эълон қилинган. Шунингдек, Исландия, Словения ва Хорватиянинг ҳам яқин орада инфекциядан халос бўлиши кутиляпти.
Бу орада жаҳонда хасталикка чалинганлар сони ошишда давом этмоқда – беморлар сафига кунига 100 мингдан зиёд одам қўшиляпти.
Жонс Хопкинс университети маълумотларига кўра, айни пайтда дунё бўйлаб коронавирусга чалинганлар сони 7 миллиондан, қурбонлар сони эса 400 мингдан ошган. Беморлардан қарийб 3,5 миллиони соғайиб кетган.