Украина президенти Володимир Зеленскийнинг рафиқаси Олена Зеленская коронавирус инфекциясини юқтириб олган. Айни пайтда биринчи хоним ўзини яхши ҳис қиляпти ва унда хасталикнинг ҳеч қанақа аломати кўринаётгани йўқ. Бу ҳақда Украина президенти офиси маълумот тарқатди.
Қайд этилишича, ҳозирда Олена Зеленская даволанишда бўлиб, оиланинг бошқа аъзоларидан ажратилган.
Ҳодиса ортидан президент Зеленский ва фарзандлари ҳам текширувдан ўтган, бироқ уларда COVID-19 инфекцияси аниқланмаган.
Биринчи хоним учрашувларда ва маиший ҳаётда карантин тартиби ва Соғлиқни сақлаш вазирлиги тавсияларига доим риоя қилганини урғулаган президент офиси унинг вирусни кимдан юқтириб олгани ҳозирча ноаниқлигини қўшимча қилган.