Албания суди Германияда «Ислом давлати» экстремистик гуруҳига аъзо бўлишда гумонланаётган Тожикистон фуқаросини экстрадиция қилиш қарорини чиқарди.
12 июнь куни Пойтахт Тирана туман судларидан бири 24 ёшдаги Комрон Зуҳуровни уни қидирувга берган Россия ёки Тожикистонга эмас, балки Германияга экстрадиция қилишга қарор қилди.
Албания полицияси Зуҳуров 30 апрель куни Интерпол билан ўтказилган қўшма рейд давомида қўлга олинганини билдирган эди.
Ундан аввалроқ Германия расмийлари мамлакат тупроғида террор хуружлари уюштиришни режалаган «Ислом давлати» гуруҳининг беш аъзоси қўлга олингани, яна икки кишининг буюртма қотилликни амалга ошириш учун Албанияга юборилгани гумон қилинаётганини маълум қилган эди.
Зуҳуровнинг адвокати мижози экстремистик гуруҳга қўшилганини рад этди. Унинг сўзларига кўра, қўлга олинишдан олдин Зуҳуров Германияда икки йил яшаган, февраль ойида қариндошини кўриш учун Албанияга борган.