“Чегара билмас мухбирлар” (RSF) халқаро ташкилоти Тожикистон ҳукуматини Covid-19 тўғрисида ёлғон ёки аниқ бўлмаган маълумотни тарқатганларни катта миқдордаги жаримага тортиш ҳақида қонунчиликка киритилган ўзгартишни бекор қилишга чақирди.
Бош қароргоҳи Парижда жойлашган ташкилот 12 июнда тарқатган баёнотида: “Қонунчиликдаги бу янги мавҳум ўзгартиш ахборот олиш ҳуқуқини чеклашда қўлланилиши мумкин”,- деб хавотир билдирди.
Тожик парламенти томонидан 10 июнда қабул қилинган янги қонунга асосан, коронавирус тўғрисида ёлғон маълумот тарқатган жисмоний шахслар 112 доллар, юридик шахслар 11000 доллар жаримага тортилади.
Тожикистон ҳукумати апрель ойининг охиригача мамлакатда коронавирус борлигини рад қилиб келган эди. Мамлакатда турли оммавий тадбирлар ва маросимлар чекловларсиз ўтказиб келинди. Фақат Жаҳон соғлиқни сақлаш ташкилоти делегациясининг май ойида Душанбега ташрифи арафасидагина ҳукумат коронавирус ҳолатлари борлигини тан олган.
Бугунги кунда расман Тожикистонда 4690 одам коронавирусга чалингани, улардан 48 нафари ўлгани айтилади.