Россия Ташқи ишлар вазирлиги бир неча кун аввал Чехиядан икки нафар рус дипломати чиқариб юборилганига жавобан Москвадан ҳам икки нафар чех дипломати чиқариб юборилишини билдирди.
Расмий баёнотда айтилишича, Чехиянинг Россиядаги элчиси Витезслав Пивонка 15 июнда икки чех дипломати “исталмаган шахс” экани ҳақида огоҳлантирилган ва уларга оилалари билан биргаликда мамлакатни тарк этиш учун икки кун муддат берилган. Дипломатларнинг исмлари очиқ айтилмади.
5 июнь куни Чехия ҳукумати Россиянинг Прагадаги элчихонасида ишловчи икки ходимни persona non grata (исталмаган шахс) деб эълон қилганди. Чехия ташқи ишлар вазири Томаш Петршичек билан биргаликда матбуот анжумани ўтказган Бош вазир Бабиш ушбу чорага "рицин фитнаси" сабаб бўлганини айтди.
Март ойида айрим чех нашрлари Россия разведкаси зобити Прагага рицин заҳарини олиб боргани ҳақда хабар қилган эди. Аслида эса бу уйдирма экани, Россиянинг Чехиядаги элчихонаси ишчилари ўртасидаги келишмовчилик натижасида ўйлаб топилгани ошкор бўлганди.
Россия рус дипломатларининг Чехиядан бадарға қилинишини “нодўстона ҳаракат”, деб атаган.