“Америка овози” директори Аманда Беннетт ва унинг ўринбосари Сандра Сугавара 15 июнь куни ўз истеъфоларини эълон қилдилар. Улар АҚШ Конгресси томонидан молиялаштириладиган бу йирик хабар ташкилотига қарийб тўрт йил раҳбарлик қилганлар.
“Америка овози” маълумотига кўра, бу вақт ичида унинг умумий аудиторияси икки баробардан кўпроқ - ҳафтасига 109 миллион кишидан 280 миллион кишигача ошган.
Беннетт “Америка овози” директори лавозимидан кетишини Сенат Глобал медиа бўйича АҚШ агентлиги (USAGM) раҳбари лавозимига президент Трамп томонидан таклиф этилган Майкл Пэк номзодини тасдиқлаганидан кўп ўтмай эълон қилди.
“Америка овози” ходимларига ёзган мактубида Беннетт: “Пэк Конгресс томонидан қасамёдга келтирилган ва “Америка овози” мустақиллигини кафолатлайдиган тизимни ҳурмат қилишга ваъда қилган, бу эса бутун дунёдаги аудиториямизнинг бизга билдирган ишончида энг муҳим роль ўйнайди”, дея қайд этган.
АҚШ президенти Дональд Трамп яқинда “Америка овози”ни танқид қилган, хусусан, унга коронавирус туфайли юзага келган бўҳрон чоғида Хитойдаги вазиятнинг ёритилиши ёқмаган. Трамп аввалроқ Майкл Пэкнинг USAGM раҳбари лавозимига тайинланишини олқишлаган эди.