“Coca-cola Ichimligi Uzbekiston, ltd” масъулияти чекланган жамиятини хусусийлаштириш режалаштирилмоқда. Давлат активларини бошқариш агентлиги бу ҳақда 22 июнь куни маълум қилди.
Агентлик ахборот хизматининг билдиришича, ширкат “шаффофликни таъминлаган ҳолда оммавий савдолар асосида хусусийлаштиришга тайёрланмоқда”.
Бу жараёнга нуфузли халқаро молия ташкилотлари, хорижий инвестиция воситачилари ва аудиторлик компанияларини жалб этиш режалаштирилган.
Ҳозирги кунда “Coca-cola Ichimligi Uzbekiston, ltd” масъулияти чекланган жамияти устав капиталидаги 57,118 фоиз улуш “Ўзбекозиковкатхолдинг” холдинг компаниясига ва 42,882 фоиз АҚШнинг “The Coca-Cola Export Corporation” компаниясига тегишли.
11 март куни “The Coca-Cola Export Corporation” 2020-2021 йилларда Ўзбекистондаги заводларига 31 миллион АҚШ доллари миқдорида инвестиция киритишни режалаштиргани хабар қилинган эди.
Қайд этилишича, “Ўзбекозиқовқатхолдинг” ширкати таркибидаги “Coca-Cola Ichimligi Uzbekiston, Ltd.” компаниясининг Ўзбекистон салқин ичимликлар бозоридаги улуши 2019 йилда 25 фоиз, ширин газланган ичимликлар бозоридаги улуши эса 50 фоиздан юқори бўлган.
Компанияда салқин ичимликлар ишлаб чиқариш ҳажми ўтган йили 33 фоизга ошган. Қўшма корхона Тошкент, Наманган ва Урганч шаҳрида жойлашган учта заводга эгалик қилади.