АҚШ президенти Дональд Трамп 22 июнь куни хориж фуқароларига ишчи виза бериш жараёнини 2020 йил охиригача тўхтатиш тўғрисидаги буйруқни имзолади.
Мазкур буйруқ асосида АҚШ ширкатлари ёллайдиган юқори малакали мутахассисларга ҳам, қишлоқ хўжалигида ишлайдиган мавсумий ишчиларга ҳам виза бериш тўхтатилади.
Оқ Уйнинг билдиришича, коронавирус пандемияси оқибатида ишини йўқотган америкаликларни биринчи навбатда иш ўрни билан таъминлаш мақсадида мана шундай қарор қабул қилинган. Мазкур буйруқ ортидан мамлакатга 500 минг киши кириб келишининг олди олинади. Миграция сиёсати институти эса 325 минг хорижлик АҚШга кира олмай қолишини билдирди. Буйруқ имзолангунига қадар виза олганларнинг АҚШга киришига тақиқ қўйилмайди.
Трамп апрель ойида ҳам сентябргача ишчи виза беришни тўхтатиш тўғрисидаги буйруқни имзолаган эди.
Трампнинг мазкур буйруғи АҚШнинг қатор йирик ширкатлари ва сиёсатчилари томонидан кескин танқид қилинди. Улар Трампнинг буйруғи АҚШда юқори малакали мутахассисларга бўлган эҳтиёжни янада кучайтиради, деб ҳисобламоқдалар.
Google раҳбари Сундар Пичай Трампнинг буйруғидан афсусда эканини билдирди. Twitter эса Трамп буйруғини “АҚШ иқтисодий пойдеворини қўпориш”, деб баҳолади.