Бадиий академия ахборот хизматининг маълум қилишича, “Хорижда сақланаётган Камолиддин Беҳзод ва унинг издошлари ижодига мансуб асарларнинг асл ёки кўчирма нусхаларини юртимизга қайтариш бўйича 2020-2022 йилларга мўлжалланган “Йўл харитаси” тасдиқланди.
Унга асосан Камолиддин Беҳзод ва унинг издошлари ижодига мансуб хориждаги асарларнинг асл ёки кўчирма нусхасини олиб келиш сингари вазифалар ҳамда уларни амалга ошириш механизмлари белгиланди.
Бундан ташқари, Камолиддин Беҳзод ва унинг издошлари асарларига оид адабиёт ва манбаларни аниқлаш, Камолиддин Беҳзод ва унинг издошлари ижодига мансуб асарларнинг хорижда сақланаётган намуналари рўйхатини шакллантириш, Камолиддин Беҳзод ва унинг издошлари асарлари сақланаётган хорижий музей ва кутубхоналар билан музокаралар олиб бориш каби вазифалар ҳам белгиланган.
Президен Шавкат Мирзиёев 2020 йил 21 апрелда “Тасвирий ва амалий санъат соҳаси самарадорлигини янада оширишга доир чора-тадбирлар тўғрисида”ги қарорни имзолаган эди.
Қарорга асосан жорий йил 14-16 октябрь кунлари Ўзбекистонда буюк мусаввир Камолиддин Беҳзод таваллудининг 565 йиллиги кенг нишонланади.