Қозоғистонда сўнгги кеча-кундузда коронавирус инфекциясини юқтириб олиш билан боғлиқ 1499 та ҳолат қайд этилган. Мамлакат Соғлиқни сақлаш вазирлиги маълумотига кўра, бу сўнгги икки ҳафта ичида инфекцияга чалиниш бўйича энг паст кўрсаткичдир.
Расмий маълумотларга кўра, Қозоғистонда COVID-19 га чалиниш бўйича 71 838 та ҳолат тасдиқланган. Маҳаллий экспертларнинг айримлари мазкур рақам анча камайтириб кўрсатилган, деган фикрдалар. Уларнинг тахминича, хасталар сони бир неча юз минг кишига етиши мумкин. Жонс Ҳопкинс университети маълумотларига кўра, ҳозирда бу мамлакат хасталар сони бўйича дунёда 29-ўринда бормоқда.
Соғлиқни сақлаш вазирлиги маълумотларига кўра, шу кунгача беморлардан 43 мингдан зиёди соғайиб кетган, 464 нафар бемор вафот этган. Бу статистикага пневмониядан вафот этганлар киритилмаган. ССВга кўра, жорий йил 1 январидан 15 июлигача пневмониядан 3327 бемор ўлган, улардан 1555 нафари жорий ойнинг биринчи ярмида оламдан ўтган.