Қозоғистонда ўтган кеча-кундузда коронавирус юқтириб олиш билан боғлиқ 1544 та янги ҳолат қайд этилган. Бу ҳақда мамлакат Соғлиқни сақлаш вазирлиги 29 июль куни маълум қилди.
ССВ маълумотига кўра, Қозоғистонда коронавирусга чалингани тасдиқланган беморларнинг умумий сони шу кунда 86192 нафарга етган. Беморларнинг ўсиш суръатида ўзгариш бўлмаса, Қозоғистон эртагаёқ COVID-19 инфекциясининг илк ўчоғи бўлган Хитой кўрсаткичига етиб олиши мумкин.
АҚШдаги Жонс Ҳопкинс университети маълумотларига кўра, Хитойда инфекцияга чалинган беморлар сони ҳозирда 86990 нафарни ташкил қилмоқда. Бироқ бу мамлакатда кунлик вирус юқтириб олиш даражаси паст.
Расмий маълумотларга кўра, Қозоғистонда COVID-19 га чалинганларнинг 56638 нафари соғайиб кетган, 793 бемор қурбон бўлган.