Ўзбекистонга соддалаштирилган тартибда хориждан импорт қилиналиган дори-дармон ва тиббий ускуналар рўйхати янгиланди.
"Газета.уз" нашрига кўра, ҳукумат умифеновир, рибавирин, ритонавир, анаферон, интерферон ва бошқа воситаларни рўйхатдан ўчирган.
28та дори воситаси, жумладан "коронавирусга қарши самарали дори" дея Хитойдан Ўзбекистонга олиб келиб тарқатилаётган “Lianhua Qingwen Jiaonang” эса рўйхатга киритилган.
“Lianhua Qingwen Jiaonang”нинг катта партияси президентнинг кенжа куëви Отабек Умаров номидан Тошкент вилояти Зангиота туманида барпо этилган кўп тармоқли махсус шифохонага топширилганди.
Ўзбекистон Фармакология қўмитаси расмийлари бу дорининг ҳукумат реестрида рўйхатга олинмаганини Озодликка айтишганди.
Енгил шамоллаш, йўталга қарши “Lianhua" дориси Хитойда Yiling Pharmaceutical ширкати тарафидан 2002 йилда ишлаб чиқилган бўлиб, дастлаб атипик пневмония эпидемияси (SARS) тарқалган пайтда беморларга тавсия этилган эди.
Айни дори Хитойда коронавируснинг енгил турига чалинганларга ҳам тавсия этилгани маълум.
Ўзбекистонда амалдаги тартиб бўйича муайян янги дори воситаларини мамлакатга олиб келиш ва реализация қилиш турли мураккаб келишув-синов жараёнларини талаб қилади.
Март ойидан пандемия шароитида Ўзбекистонга дориларни четдан соддалаштирилган тартибда олиб келиш йўлга қўйилди. Соддалаштирилган тартибда олиб келинган дорилар ва тиббий ускуналар ҳам ҳукумат реестрида рўйхатга олинади.