Висконсин губернатори 24 август куни Кеношу шаҳрига Миллий гвардияни киритиш тўғрисида кўрсатма берди.
Кеношуда полициячи афроамерикаликни отиб қўйгани ортидан норозилик намойишлари бошланиб, кейин тартибсизликлар юзага келди.
Полициячи томонидан отиб қўйилган 29 ёшли Жейкоб Блейк маҳаллий касалхонада операция қилингани, аҳволи оғир экани айтилмоқда. Унинг танасидан жарроҳлар бир неча ўқни олиб ташлаганлар.
Губернатор Тони Эверс штат Миллий гвардиясининг 125 аскарига юз минг киши истиқомат қиладиган Кеношу шаҳрига етиб келишга буйруқ берди.
Маҳаллий ҳукумат шаҳарда соат тунги 8дан кейин комендантлик соати жорий қилди. Норозилик намойишларининг биринчи кунида содир этилган тартибсизликларда бир неча автомобиль, давлат ва хусусий мулк объектлари ёқиб ташланди, полиция билан тўқнашувлар юз берди.
23 августда тарқатилган видеода Жейкоб Блейк бир автомобиль олдида айланиб юргани акс этган. У автомобиль эшигини очиши билан бир полициячи уни ёқасидан тутган ва етти марта отилган ўқ овози эшитилган.
Полиция бўлиб ўтган воқеа юзасидан ҳозирча муносабат билдирмади. Кеношуда бошланган норозилик намойишлари мамлакат бўйлаб тарқалиши мумкин.Айни пайтда Нью-Йорк, Вашингтон ва бошқа йирик шаҳарларда норозилик намойишлари ўтказиш режалаштирилаётгани хабар қилинди.