Беларус полицияси норозилик намойишларнинг 18-кунида Минскда яна 20 кишини қўлга олди. 27 августга ўтар кечаси Минскдаги Мустақиллик майдонига чиққан норозилар президент Лукашенко истеъфосини талаб қилишда давом этди.
Европа Иттифоқи Беларус ҳукуматини намойишчиларга қарши куч қўллаётганини ва уларни қўлга олаётганини қоралади. Жумладан, 26 август куни Германия ташқи ишлар вазири Хайко Маас: “Беларус ҳукумати инсон ҳуқуқлари ва демократик тамойиллар асосларини жиддий равишда бузмоқда”, -деб билдирди.
Ҳуқуқ фаолларига кўра, Беларусда норозилик намойишлари бошланганидан бери камида 7 минг киши қўлга олинган.
Мамлакат расмийлари 9 август куни бўлиб ўтган сайлов натижалари эълон қилиниши ортидан бошланган норозилик намойишларига жавобан мухолифатга босимни кучайтирмоқда. 26 август куни Беларусда адабиёт бўйича Нобель мукофоти совриндори Светлана Алексиевич сўроқ қилинди. Сўроқ 40 дақиқа давом этди.
Беларусда 9 август куни бўлиб ўтган сайловда амалдаги президент Александр Лукашенко ғолиб чиққани эълон қилинганидан бери мамлакатда норозилик намойишлари тўхтамаяпти.