АҚШ Адлия вазирлиги Висконсин штати Кеношу шаҳридаги тартибсизликларни бостириш учун федерал ҳуқуқ-тартибот органларининг 200 нафар ходимини воқеа жойига юборди.
Адлия вазирлиги зарурат пайдо бўлса Кеношуга тартиб ўрнатиш учун яна қўшимча кучларни киритиши мумкинлигини таъкидлади. Кеношуга федерал кучларни киритиш ҳақида президент Дональд Трамп кўрсатма берган.
Висконсин губернатори Тони Эверс 25 август куни штатда фавқулодда ҳолат жорий этган ва Кеношу шаҳрига Миллий гвардиянинг кучайтирилган қўшинини юборган эди. Мазкур шаҳарда юз минг аҳоли истиқомат қилади.
Шаҳарда 23 август куни 29 ёшли афроамерикалик Жейкоб Блейк оқ танли полициячи томонидан отиб қўйилганидан сўнг бошланган норозилик намойишлари тартибсизликларга айланиб кетган эди.
Блейк касалхонада операция қилиниб, унинг танасидан кўплаб ўқлар олиб ташланган. Унинг аҳволи оғирлигича қолмоқда.
Тартибсизликларда икки киши ҳалок бўлди, бир киши яраланди. Уларга ўқ отганликда гумонланаётган ўсмир 26 августда полиция томонидан қўлга олинди.