Россиянинг Допингга қарши кураш агентлиги (РУСАДА) раҳбари Юрий Ганус ишдан ҳайдалди.
Жаҳон допингга қарши кураш агентлиги (WADA) бу ҳолат ташкилотнинг рус агентлиги ҳақидаги хавотирларини кучайтирганини айтди.
РУСАДАга уч йил раҳбарлик қилган Ганус Россияда спортчилар ман этилган моддаларни қабул қилишига қарши етарлича чора кўрилмаётганини айтиб келади.
Россия Олимпиада қўмитаси президенти Станислав Поздняков Ганусни ишдан олиш қарори бир овоздан қабул қилганини айтди.
РУСАДА ҳуқуқшуноси Михаил Буханов ташкилотнинг амалдаги раҳбари этиб тайинланди.
Ганус Россия Олимпиада қўмитаси ўтказган тинтув ортидан ишдан олинди. Гануснинг ўзи аудит қоидаларга амал қилмай ўтказилганини айтди.
Ҳафта бошида Гануснинг ўринбосари истеъфога чиққан эди.
2015 йилдан бери Россиянинг боши спорт можароларидан чиқмай келади. 2019 йилда WADA Россияни тўрт йилга йирик мусобақалардан, жумладан, Токио Олимпиада ўйинларидан четлатди.