Беларус полицияси 30 август кунги тинч норозилик юришида қатнашиш учун Минск кўчаларига чиққан айрим норозиларни ҳибсга олди.
Минскда яна минглаб одам Александр Лукашенконинг қайта президентликка сайланишидан норози бўлиб, акцияда иштирок этди.
Хабарларга қараганда, қуролланган ҳарбийлар шаҳарнинг қатор йирик кўчаларида норозилик намойиш иштирокчиларининг йўлини тўсган, Тинчлик майдони яқинида эса намойишчиларни қўлга олган.
Қўлга олинганлар махсус панжаралар билан жиҳозланган машиналарда олиб кетилган, бунга гувоҳ бўлган намойишчилар эса “Уят!” деб ҳайқиришган.
30 август кунги намойишлар олдидан, Беларус Ички ишлар вазирлиги, бу тадбирга рухсат берилмаганини айтиб, мамлакат аҳлини унда иштирок этмасликка чақирган.
Журналистлардан эса намойишчилар ва намойиш ўтаётган ҳудудлардан, “ўз хавфсизлиги учун” 100 метр нарида туриш сўралган.
Беларусда 9 август кунги президент сайловидан кейин – 22 кундан буён норозилик намойишлари тўхтамаётир.
Норозилар мамлакатни 26 йилдан бери бошқараётган Александр Лукашенконинг президентликдан кетишини талаб қилмоқда.
Минскда 30 август кунги акциядан жонли репортажни қуйида томоша қилишингиз мумкин: