Туркиялик адвокат Эбру Тимтик очлик эълон қилганидан 238 кундан сўнг 43 ёшида Истанбулдаги касалхонада вафот этди.
Associated Press агентлигининг Прогрессив юристлар бирлашмасига таянган ҳолда хабар беришича, Эбру Тимтик террорчиликда айбланганлар ва ўз ҳамкасбларига нисбатан суд жараёнлари адолатли ўтказилишини талаб этиб очлик эълон қилганди.
Эбру Тимтик ва унинг 17 ҳамкасби “Инқилобий халқ озодлиги партия-фронти”га алоқадорликда айбланаётган эди. Бу ташкилот Туркия, АҚШ ва Европа Иттифоқида террорчи деб тан олинган.
Тимтик 2019 йилда 13,5 йилга қамалган. Унинг иши апелляция судида қайта кўриб чиқилаётганди.
Тимтик билан бирга февраль ойида адвокат Айтач Унсал ҳам очлик эълон қилганди. Унинг аҳволи оғир экани билдирилди.
Франция халқаро радиосининг маълум қилишича, Туркияда террорчиларга алоқадор деган гумон билан 1500дан кўпроқ адвокат босим остида қолган, улардан 605 нафари қўлга олинган. Қўлга олинган адвокатлардан 441 нафарига суд ҳукми ўқилган.