«Кино» гуруҳининг асосчиси Виктор Цойнинг ўғли Александр Цой Россия президенти Владимир Путинга мурожаат йўллаб, отаси ҳақида режиссёр Алексей Учитель томонидан олинган фильмни тақиқлашни илтимос қилди.
Цойнинг меросхўри ўз мурожаатида отасининг сиймосини фильмда ишлатишга рухсат бермаганини билдирди. Бундан ташқари, Александр Цой фикрича, фильмда «шахсий ҳаётга оид маълумотлар, жумладан, миш-мишларга, тўқима ва тухматга асосланган маълумотларнинг мавжудлиги» Виктор Цой яқинларининг манфаатлари ва жамият манфаатларига зид келади.
Мурожаатда Виктор Цой «нафақат ўз оиласининг тарихига, балки мамлакат тарихига мансуб инсон экани» ва шундан келиб чиққан ҳолда «унинг сиймосини молиявий фойда кўриш мақсадида ишлатиш» мумкин эмаслиги қайд этилади.
Александр Цой Путиндан фильмни суд қарорисиз тақиқлашни сўраган. Алкександр Цойга кўра: «Суднинг ҳукми адолатни тиклаш сифатида қабул қилинмаслиги мумкин».
Алексей Учитель суратга олган «Цой» фильми 3 сентябрдан намойишга чиқарилиши режалаштирилган эди. Бироқ фильм прокати номаълум муддатга қолдирилди.
Фильм сюжети тўқима бўлиб, унда Виктор Цой ҳалок бўлган автоавария иштирокчиси - «Икарус» автобусининг ҳайдовчиси Цой жасади солинган тобутни Ригадан Ленинградга олиб кетаётгани ҳикоя қилинади.
Алексей Учитель Цой билан шахсан таниш бўлган. У 1989 йилда Виктор Цой ҳақида «Рок» деган ҳужжатли фильмни суратга олган эди.