Хитой ҳукуматининг “Синьхуа” ахборот агентлиги 6 сентябрь куни кўп марталик космик кема орбитадаги икки кунлик парвоздан сўнг Цзюцюань сунъий йўлдошларни учириш маркази яқинидаги даштга муваффақиятли қўнганини билдирди.
Хабарда айтилишича, мазкур космик кема 4 сентябрь куни Long March 2F ракетаси воситасида фазога чиқарилган эди.
Айни пайтда мазкур хабарнинг нақадар ишончли эканини текшириб кўриш имконияти бўлмади. “Синьхуа” ҳам, бошқа давлат нашрлари ҳам ерга қайтган космик кема фотосуратларини ва парвоз тафсилотларини эълон қилмади.
Хитой жаҳонда коинотни ўзлаштиришга ҳаракат қилаётган давлат сифатидаги мақомини мустаҳкамлаш учун кўп мартали космик кемани яратиш устида ишлаб келмоқда.
Хиой ўзининг биринчи фазогирини коинотга 3003 йилда учирганди. Ўтган йили эса Хитой жаҳонда илк марта ойнинг орқа томонига роботлаштирилган космик аппаратни қўндиришга муваффақ бўлган. Хитойнинг яна бир космик аппарати эса Марсга йўл олган.
Space News сайтининг ёзишича, Хитой АҚШ Ҳарбий ҳаво кучлари томонидан яратилган X-37B кўп мартали космик кемаси аналогини ишлаб чиқаришга ҳаракат қилмоқда. Кўп мартали космик кемаларни биринчи марта Илон Маскнинг SpaceX ширкати қўллай бошлаган эди.