Буюк Британияда коронавирус инфекцияга чалиниш ҳолатлари яна кўпая бошлагани туфайли жорий йил 14 сентябридан олти нафардан зиёд одамнинг бир жойга йиғилиши тақиқланади. Би-би-си хабарига кўра, бу тартибни бузганларга 100 фунт ( тақрибан 129 АҚШ доллари) миқдорида жарима солинади, бу қонунбузарликни такроран содир этганлардан эса 3 200 фунт ( тақрибан 4130 АҚШ доллари) жарима ундирилади.
Янги тартиб мактаблар, иш жойлари ҳамда тўй ва дафн маросимлари учун тааллуқли эмас.
Ҳозирда 30 нафаргача кишининг бир жойга йиғилишига рухсат бор.
Соғлиқни сақлаш вазири Мэтт Хэнкок мазкур чораларни Рождество байрамигача юмшатиш мумкин бўлишига умид билдирган.
Британияда карантин чоралари март ойи охиридан киритилган, чеклов чоралари май ойидан босқичма-босқич бекор қилина бошлаган, бироқ уларнинг бир қисми ҳалигача ўз кучида қолмоқда.
Сўнгги кунларда Британияда коронавирус инфекциясига чалиниш бўйича кунига ўртача икки мингдан зиёд ҳолат қайд этилмоқда. Вирус юқтириб олиш ҳолатлари Европанинг бошқа мамлакатларида ҳам кўпайиб боряпти: дейлик, Италияда кунига мингдан зиёд одам, Францияда эса ўртача олти-етти минг киши хасталикка чалинмоқда. Чехияда сўнгги кеча-кундузда коронавирусга чалиниш ҳолати эпидемия бошидан бери рекорд даражага (кунига 1000 дан зиёд хасталаниш ҳолати) чиқди. Қатор мамлакатларда ниқоб тақиб юриш ва оммавий тадбирлар ўтказиш бўйича тартиб кучайтирилмоқда. Бироқ баҳордаги каби карантин чоралари ҳали жорий қилинганича йўқ.