Россия, Хитой ва Эронга алоқадор хакерлар Қўшма Штатлардаги бўлажак президент сайловига алоқаси бўлган одамлар ва гуруҳлар хатти-ҳаракати устидан кузатув олиб бормоқда. Бу ҳақда билдирган Microsoft ширкати тўрт йил муқаддам Демократик партия серверларини бузиб кирган хакерлар яна сайловга аралашишга уринаётганини қайд этди.
Ширкат экспертлари хакерлар ўз нигоҳларини номзодларнинг ҳар иккаласига – амалдаги президент, республикачи Дональд Трамп ва демократ Жо Байденга тикканини айтмоқдалар.
Microsoft ширкати Strontium гуруҳига кирувчи россиялик хакерлар 200 дан зиёд ташкилот серверларини бузиб киришга урингани ҳақида маълум қилган.
“2016 йилда кузатганимиз каби Strontium муҳтамалан разведка хизматларига ахборот йиғишда ёрдам бериш ёки қўпорувчилик амалиётларида фойдаланиш учун фойданувчиларнинг ҳисоб ёзувларига оид маълумотларни қўлга киритмоқчи бўляпти”, дея билдирди Microsoft ширкатининг хавфсизлик учун масъул вице-президенти Том Бёрт.
IT-ширкат маълумотига кўра, хитойлик хакерларни Жо Байден атрофидаги одамлар қизиқтиряпти, эронлик хакерлар эса Оқ уйнинг амалдаги раҳбари Дональд Трамп билан боғлиқ шахсларнинг компьютерларига ҳужум уюштирмоқдалар.
Киберҳужумларнинг аксарияти, Microsoft маълумотига кўра, муваффақиятсиз якунланган. Экспертларнинг қўшимча қилишларича, умуман олганда, овоз бериш тизимига бевосита алоқадор ташкилотлар ҳужум объектига айланган эмас.