Исроил коронавирус инфекцияси тезлик билан ёйилиб бораётгани важидан 18 сентябрдан карантин чораларини қайта жорий қилади. Бу ҳақда якшанба куни бош вазир Биньямин Нетаньяху маълум қилди.
Сўнгги пайтларда бу мамлакатда кунига бир неча минг киши коронавирусга чалинмоқда, бунинг ортидан Исроил жон бошига хасталикни юқтириб олиш бўйича дунёдаги олдинги ўринлардан бирига чиқиб олган.
Карантин камида уч ҳафта (9 октябргача) давом этиши кутилмоқда. Бу давр оралиғида Исроилда яҳудийларнинг синагогаларда кўплаб киши йиғиладиган бир неча байрами бўлиб ўтиши керак. Аввалроқ ҳукуматдаги вазирлардан бири карантин чоралари диндорлар ҳуқуқларини бузишини айтиб, бу чораларга қарши норозилик ўлароқ истеъфога кетган.
Келаётган жума кунидан бошлаб Исроилда мактаблар, ресторанлар, савдо марказлари ва меҳмонхоналар ёпилади. Одамларнинг ўз уйларидан 500 метрдан нари масофага чиқиши тақиқланади. Қатор шаҳарларда комендантлик соати ҳам киритилган. Бироқ бу чоралар баҳорда киритилганидан кўра юмшоқроқ. Баҳорда одамларга узрли сабабсиз уйини тарк этиш ҳам тақиқлаб қўйилганди. Баҳордаги қатъий чоралар, мутахассисларга кўра, Исроилда коронавирус тез тарқалишининг олдини олган.