Коронавирусга қарши Хитойда ишлаб чиқарилган вакцина жорий йилнинг ноябрь ойига бориб эмлов учун тайёр бўлиши мумкин. Бу ҳақда Хитойнинг хасталикларни назорат қилиш ва олдини олиш маркази вакили Гуйчжэнь Ву билдирди, дея хабар қилди Reuters агентлиги.
Қайд этилишича, Хитойда ишлаб чиқарилаётган тўрт вакцина клиник синовларнинг якуний босқичида турибди. Учинчи босқичдаги синовлар, мутахассисларга кўра, яхши ўтмоқда ва вакциналар оммавий эмлов учун ноябрь ёки декабрь ойида тайёр бўлиши тахмин қилиняпти.
Хитой ўзида ишлаб чиқарилган коронавирусга қарши вакцинани сотиб олишни Ўзбекистонга ҳам таклиф қилган. Қайд этилишича, бу масала ҳозирда мамлакат Соғлиқни сақлаш вазирлиги томонидан ўрганилмоқда.
“Айни вақтда ҳамкасбларимиз вакцинанинг учинчи клиник синовида иштирок этиш ёки тайёр вакцинани синовлар муваффақиятли ўтганидан сўнг сотиб олиш масаласини ўрганаяпти”, деганди бу ҳақда Ўзбекистон соғлиқни сақлаш вазирининг биринчи ўринбосари, Санитария-эпидемиологик осойишталик агентлиги директори Баҳодир Юсупалиев “Коммерсантъ” нашрига берган интервьюсида.