АҚШ президенти Дональд Трамп 4 октябрь куни қисқа муддатга ўзи COVID-19дан даволанаётган ҳарбий госпитални тарк этди. У Уолтер Рид Миллий ҳарбий госпитали атрофини зирҳли ҳарбий машинада айланиб чиқди.
Трамп тарафдорлари АҚШ байроқларини ҳилпиратиб, уни олқишладилар. Трамп коронавирусга чалингани ортидан мазкур касалхонага 2 октябрь куни ётқизилган эди.
Президент 3 октябрь куни Twitterда эълон қилган видеомурожаатида кейинги кунлар «ҳақиқий синов» бўлишини айтиб, уни ўйлаб, қайғураётган америкаликлар ва хорижликларга миннатдорчилик изҳор қилганди.
Трамп танқидчилари президент касалхонани тарк этиб, яна вирусга қарши кураш тартиб-қоидаларини бузганини таъкидлашмоқда.
Аввалроқ президентни даволаётган шифокорлар унинг аҳволи ва кайфияти яхши эканини, у 5 октябрда касалхонадан чиқиши мумкинлигини билдирган эди.