Беларусь матбуотининг хабар беришича, 10 октябрь куни президент Александр Лукашенко қамоққа олинган мухолифатчилар билан учрашган.
Хабарларда айтилишича, Лукашенко ўзи қаматган мухолифатчилар билан конституцияга ўзгартириш киритишни муҳокама қилган.
"Нафақат сизларнинг тарафдорларингизни, балки бутун [Беларусь] жамиятини бу нарсаларга кенгроқ назар билан қараш кераклигига ишонтиришига ҳаракат қиляпман", деган авторитар президент.
Европа Иттифоқи ҳамда АҚШ август август ойида ўтказилган сайлов натижалари сохталаштирилганини айтиб, Лукашенкони Беларуснинг легитим президенти ўлароқ тан олишдан бош тортди.
Сайлов ортидан бошланган норозилик намойишлари икки ойдан бери тинчимаяпти.
Президент матбуот хизмати эълон қилган фотосуратда Лукашенконинг Виктор Бабарико, Лилия Власова, Виталий Шкляров каби мухолифатчилар билан суҳбатлашаётгани акс этган.
Беларусь мухолифати вакиллари Лукашенконинг ушбу ташрифи унинг ожизлигидан аломат беради, деб ҳисобламоқда.