Европа Иттифоқи инсон ҳуқуқлари қўпол тарзда бузилаётгани ва демократик тамойилларга амал қилинмаётгани ортидан Россия ҳамда Беларусга нисбатан янги санкциялар жорий этишга келишиб олди.
12 октябрь куни Люксембургда Европа Иттифоқига аъзо 27 давлат ташқи ишлар вазирлари саммитида Беларусда 4 августда ўтган президентлик сайлови “холис ва эркин бўлмагани” таъкидланди.
Европа Иттифоқи ташқи ишлар вазирлари бунинг ортидан амалдаги президент Александр Лукашенко “ҳеч қандай легитимликка эга эмас”, деган қарорга келдилар.
Санкциялар биринчи навбатда президент Александр Лукашенкога тааллуқли бўлади.
Бундан ташқари ташқи ишлар вазирлари Франция ва Германия томонидан Москвага нисбатан санкция киритиш бўйича таклифини қўлладилар. Навбатдаги санкциялар россиялик мухолифатчи Алексей Навальний заҳарланиши билан боғлиқ бўлади.
Европа Иттифоқи ташқи ишлар мутасаддиси Хосеп Боррелл саммит якунланганидан сўнг матбуотга вазирлар «янги санкциялар пакетини тайёрлаш учун яшил чироқни ёқиб бердилар», деб айтди.
Аввалроқ Европа Иттифоқи Беларусда президентлик сайловлари натижалари сохталаштирилишига ва норозиларга қилинаётган зўравонликларга алоқадор 40 нафар беларус амалдорига нисбатан санкциялар жорий қилган эди.