Эрон ерости заводида уранни бойитадиган етук центрифугаларни ўрнатишни режаламоқда. Бу ҳақда Reuters агентлиги БМТ қошидаги Халқаро атом энергияси агентлигининг (ХАЭА) махфий ҳисоботига таянган ҳолда хабар қилди.
ХАЭА ҳисоботида ёзилишича, Эрон пойтахт Теҳрондан тахминан 300 километр масофада жойлашган Натанз шаҳридаги ерости заводида учта IR-2m центрифугаларини ўрнатмоқчи.
2015 йилда қудратли давлатлар билан имзолаган ядровий келишувга биноан, Эрон ушбу заводда биринчи авлод IR-1 центрифугаларидан фойдаланиши мумкин, холос.
Reuters Эрон яқинда Натанзда бир гуруҳ IR-2m машиналари кластери билан уранни бойита бошлагани, яна иккита кластер ўрнатишни режалаётгани ҳақида хабар қилди.
АҚШ президенти Доналд Трамп 2018 йилда келишувдан Вашингтонни чиқариб олиб, Эронга қарши санкция жорий қила бошлади. Ўшандан бери Эрон келишув шартларини мунтазам равишда бузмоқда.