20 декабрь куни яна минглаб норози, президент Александр Лукашенконинг истеъфосини талаб қилиб, Минскда намойишга чиқди.
Минскнинг қатор туманларида намойишчиларнинг юришлари кузатилмоқда, аксари мухолифатнинг қизил ва оқ тусдаги байроғини кўтариб олган.
Ҳозирча, намойишчиларни полиция қўлга олганига оид бирорта хабар кузатилмади.
Шундай кичик намойишлар 19 декабрь куни ҳам Минск ва бошқа бир неча йирик шаҳарларда кузатилди.
Беларусда норозилик намойишлари 9 августдаги президентлик сайловида Александр Лукашенко ғолиб, деб эълон қилинганидан кейин бошланиб кетди, шу кунгача тингани йўқ.
Намойишчилар кетма-кет олти марта президентликни эгаллаган Лукашенконинг истеъфоси ҳамда қайта сайлов ўтказилишини талаб қилмоқда.
Уларга кўра, сайловда мисли кўрилмаган сохталаштиришлар бўлган ва намойиш иштирокчиларига хавфсизлик кучлари ходимлари томонидан аёвсиз куч қўлланган.
Норозилик акцияларини бостириш чоғида камида беш киши нобуд бўлган. Ҳуқуқ фаолларига кўра, шу кунгача 27 мингга яқин намойишчи қўлга олинган, турли муддатга ҳибс қилинган.