Мусулмонлар идораси Уламолар кенгаши бу йил Ўзбекистонда Қурбон ҳайити намозини ўқимаслик тўғрисидаги фатвони эълон қилди.
Идора расмий сайтида "Уламолар кенгашининг коронавирус (COVID-19) вабосининг кенг тарқалиши олдини олиш бўйича ФАТВОСИ" эълон қилинди.
Фатвода, пандемия оқибатларини юмшатиш мақсадида жума намозларини ҳам вақтинча ўқимаслик айтилган. Бундан ташқари, вакцина олмаслик дуруст эмас, деб фатво берилган.
Ўзбекистонда бу йилги Қурбон ҳайити 20 июлга белгиланган.
16 июль куни жамоатчиликка эълон қилинган фатвода шундай дейилади:
"Қурбон ҳайити намозида катта жамоат бир жойда жамланишини инобатга олиб, пандемия янада авж олмаслиги, вабо оқибатларини юмшатиш мақсадида шу куни ийд намози адо этилмайди, ўрнига уйда Зуҳо намозини ўқиш тавсия этилади".
Фатвода пандемия оқибатларини юмшатиш мақсадида жума намозларини ҳам вақтинча ўқимаслик белгиланган.
Бошқа намозлар барча карантин талабларига риоя қилган, ниқоб таққан ва оралиқ масофани сақлаган ҳолда, масжидларнинг очиқ саҳнларида адо этилиши мумкин.
Масжидларда қўл бериб ёки қучоқлашиб кўришиш қатъиян таъқиқланди.
Шунингдек, идоранинг фатвосида вакцина олмаслик ва унинг таркиби тўғрисида бўлмағур гапларни тарқатиш ҳам "дуруст эмас" деб таъкидланди:
"Вакцина олмаслик, унинг таркиби тўғрисида бўлмағур гапларни тарқатиш дуруст эмас. Давлатимиз барча талабларга жавоб берувчи вакциналар воситасида оммавий равишда эмлаш ишларини амалга ошираётган экан, барча юртдошларимиз ўзлари ва оила аъзоларини, шифокорлар билан келишган ҳолда, эмлатишлари мақсадга мувофиқ бўлади".
Айтилишича, идоранинг турли вилоятлардаги вакиллари аҳоли орасида вакцина олиш ва бу борадаги фатвонинг мазмунини тушунтириш ишларини олиб боради.
Gazeta.uz нашрининг ёзишича, аввалроқ идора раисининг биринчи ўринбосари Ҳомиджон Ишматбеков, маҳаллий матбуотга жавобан, Ислом динида вакцина олишга тақиқ йўқлигини айтган:
"Бизга савол ҳам келади, вакцина баъзи ножоиз нарсалардан тайёрланаётган экан, деган мазмунда. Aслида ундай эмас. Бўлган тақдирда ҳам, бир нарса бошқа нарсага ўтганда, у ўзгаради деган қоидалар бор. Бу дорими, дорилик шароитига келгунча у асли ҳолатдан ўзгариб кетади. Шунинг учун бу нарсаларга эътибор бериш керак эмас. Мутахассис шуни даво деб тайинладими, демак, бу ҳалол томонга ўтди деган хулосани беряпмиз".
Соғлиқни сақлаш вазирлиги берган маълумотга кўра, 16 июлга келиб коронавирусга қарши тўлиқ эмланганлар сони 997,34 нафарга етган, жами 5,5 млн. доза вакцинадан фойдаланилган.
Ўзбекистон президенти Шавкат Мирзиёев фармони билан бу йил мамлакатда Қурбон ҳайитининг биринчи куни қилиб 20 июль белгиланган.
Айни ҳужжат билан, бу йилги Қурбон байрамида ўзбекистонликлар, иш кунлари бошқа кунга кўчирилгани муносабати билан, 20, 21 ва 22 июль кунлари дам олади.