АҚШ Президенти Жо Байден 11 сентябрь воқеаларининг 20 йиллигига бағишланган видеомурожаатида америкаликларни бирликка чақирди.
Олти дақиқалик видеода у 2001 йил 11 сентябрь куни Ню Йорк ва Вашингтонда содир этилган террор ҳужумда ҳалок бўлган 2977 киши ва ҳужумлар жойида ишлаган қутқарувчиларга ҳурмат бажо келтирди.
"Қанча вақт ўтгани муҳим эмас, биз жонини берган ҳар бир киши хотирасини ҳар сонияда, ҳар ойда, йиллар ўтиб ҳам ёдга олаверамиз", деди Байден.
АҚШ президенти ўз мурожаатида бирлик Қўшма Штатларнинг энг катта кучи бўлиб қолишини қўшимча қилди.
"Биз Хемингуэй ёзганидек, биз бузилган жойлардан куч топамиз. Биз зулматда ёруғликни топамиз. Биз тақдирни тикланиш, янгиланиш ва қайта қуришда топамиз. Дўстим бундан 20 йил олдин, сентябр ойида айтганидек, биз қўрқмаслигимиз керак", - деди Америка президенти нутқини якунлар экан.
АҚШ президенти Жо Байден учта ёдгорлик жойига ташриф буюради. Жо Байден ва вице-президент Камала Харрис Пенсилвания штатидаги дала ёдгорлигини ҳам зиёрат қилади, у ерга тўртинчи ўғирланган самолёт қулаганди.
2001 йил 11 сентябрда жиҳодчилар тўртта йўловчи самолётини олиб қочишган.
Улардан иккитаси Ню Йоркдаги Жаҳон савдо марказининг эгизак минораларига урилган.
Учинчи самолёт Вашингтондаги Мудофаа вазирлиги биносига йўналтирилган ва Пентагоннинг ғарбий қанотига қулаган.
Тўртинчи самолёт экипажи ва йўловчилари босқинчиларни назоратга олишга ҳаракат қилишди, оқибатда лайнер Пенсилвания штатида қулаб тушди.
Ҳужумларда қарийб уч минг киши ҳалок бўлган. Теракт қурбонлар сони бўйича тарихдаги энг йирик ҳужум бўлди.