Чечен мулозимлари ижтимоий тармоқлардаги саҳифаларида республика раҳбари Рамзан Қодиров “номаъқул сўзлар” учун ўч олишни ваъда қилгани акс этган қисқа видеороликларни эълон қилишди.
Бу ҳақда Кавказ.Реалии хабар бермоқда.
Жумладан, Чечен парламенти раиси Магомед Даудов Instagram саҳифасида ёйинлаган видеода, Қодиров ўз танқидчиларининг умри “жуда оз” қолганига онт ичади.
“Аллоҳга қасамки, шаънимизга номаъқул сўз айтувчилар, гарчи бу дунё остин-устун бўлиб кетса ҳам, биз уларнинг олдига етиб боргунча яшаб турадилар холос”, дейди Қодиров.
У, шунингдек, қасос олмасдан ўлиб кетишдан қўрқишини айтади ва “агар авлодларим қасос ололмасалар, уларни кечирмайман”, дейди.
Шунингдек, видеоролик тагидаги изоҳда Магомед Даудов ҳам, ҳар бир киши айтган гапига жавоб бериши кераклигини ёзади.
“Ҳақиқий чечен ўз шарафи ва номусига тил теккизган одамдан жавоб талаб қилади. Бу одат қадимдан бўлган ва, токи халқимизнинг муносиб ва жасур ўғиллари бор экан, бундан кейин ҳам бўлажак”, дейди чечен парламенти раҳбари.
Қодиров қасос хусусида гапирган йиғилиш чечен телевидениеси орқали узатилган ва Instagram тармоғида ҳам эълон қилинган эди, аммо бир суткадан сўнг видео ўчирилди.
Ушбу йиғилишдан сўнг бир неча чечен блогери Чеченистонда яшаётган қариндошлари ўғирланганини маълум қилди.
Аввалроқ мухолифатчи блогер Тумсо Абдураҳмоновнинг Чеченистондаги қариндошлари ўғирлаб кетилгани ҳақида хабар қилинган эди. Блогерга кўра, ўғирланган қариндошларига олдинроқ "Тумсони тийиб қўйиш" талаби қўйилган, акс ҳолда уларга қонли интиқом билан таҳдид қилинган.
Чеченларнинг “Вайфонд” ҳуқуқбонлик уюшмаси ўз муассиси Мансур Садуллаевнинг қариндошлари ўғирланганини билдирди.
Германияда яшаб турган чечен мухолифатчи блогери Минкаил Мализаев видеомурожаат билан чиқиб, унда Чеченистонда қолган қариндошлари ўғирлаб кетилиб қийноққа солинаётганини ва жинсий зўрланаётганини маълум қилди.