Англия премьер лигасининг “Манчестер Сити” клуби ижтимоий тармоқлардаги саҳифаларида ўзбекистонлик футболчи Абдуқодир Ҳусановни ўз таркибига қабул қилганини расман эълон қилди.
Инглиз клуби истеъдодли ҳимоячини Франциянинг “Ланс” жамоасидан 40 миллион еврога сотиб олган. Бу қиймат бонуслар ҳисобига яна ортиши кутилмоқда.
Шу тариқа 20 ёшли Абдуқодир Ҳусанов АПЛда ўйнайдиган илк ўзбек футболчисига айланди.
Спорт нашрлари хабарига кўра, Абдуқодир “Манчестер Сити” клуби билан 2029 йил июнига қадар шартнома имзолаган. Келишувни яна бир йилга узайтириш имконияти мавжуд.
Абдуқодир Ҳусанов футболчилик фаолиятини Тошкентнинг “Бунёдкор” клуби академиясида бошлаган. 2022 йилда Беларуснинг “Энергетик-БГУ” клубига ўтган. 2023 йилдан эса “Ланс” жамоаси шарафини ҳимоя қилиб келган.
Жаҳондаги истиқболи порлоқ ҳимоячилар рўйхатига киритилган Абдуқодирнинг трансфери ижтимоий тармоқларнинг ўзбек сегментида оламшумул ҳодиса сифатида муҳокама қилинганини кузатиш мумкин.
Маҳаллий матбуот хабарига кўра, ўзбек футболчисининг инглиз клуби сафига ўтишига президент Шавкат Мирзиёев ҳам муносабат билдирган.
Мирзиёев БААда Абу Даби валиаҳд шаҳзодаси Шайх Холид ибн Муҳаммад Ол Наҳаён билан суҳбатда Абдуқодирнинг “Манчестер Сити” клуби сафига ўтаётганидан “жуда хурсанд бўлгани”ни айтган.
Ол Наҳаён сулоласининг бошқа бир вакили, БАА вице-президенти Шайх Мансур “Манчестер Сити” клубининг хўжайини ҳисобланади.