Тошкент вилояти Ангрен шаҳридаги учта боғчада 18 нафар тарбияланувчи 13-14 сентябрь куни касалхонага ётқизилган. Бу ҳақда Мактабгача таълим агентлиги матбуот хизмати маълумот тарқатди.
Қайд этилишича, касалхонага тушган 1-сонли боғчанинг 3 нафар, 10-сонли боғчанинг 14 нафар ҳамда 37-сонли боғчанинг бир нафар тарбияланувчисига бирламчи ич бузилиши ташхиси қўйилган.
“Ҳозирда барча тарбяланувчилар шифокорлар назоратида эканлигини маълум қиламиз”, дейилган хабарномада тарбияланувчиларнинг касалхонага тушиш сабаблари очиқланган эмас.
Хабарномада ҳолат Мактабгача ва мактаб таълими вазирлиги томонидан назоратга олингани, бунга оид бошқа маълумотлар Санитария-эпидемиологик осойишталик ва жамоат саломатлиги ҳудудий бўлими томонидан якуний экспертиза хулосаси тақдим этилганидан сўнг берилиши қўшимча қилинган.
Бу орада Санитария-эпидемиология қўмитаси Ангрендаги 10-сонли боғчада чоршанба ва пайшанба кунлари тарбияланувчилар кўнгил айниши, қайт қилиш, тана ҳароратининг кўтарилиши, тез-тез ич келиши каби шикоятлар билан мурожаат қилишгани, улардан 24 нафари “Овқатдан заҳарланиш ёки ошқозон фаолиятининг функционал бузилиши” ташхиси билан касалхонага ётқизилгани, 7 нафарига бирламчи тиббий ёрдам кўрсатилиб, уйига рухсат берилганини маълум қилди.
Қўмита вакилларига кўра, ҳодиса ортидан 240 нафар тарбияланувчи шифокорлар томонидан тўлиқ тиббий кўрикдан ўтказилиб, назоратга олинган, боғча фаолияти эса вақтинчалик тўхтатилган.
Хабарномада Санэпидқўмита ходимлари томонидан лаборатор текширувлар учун юқумли касалликлар бўлимига мурожаат қилган беморлардан ва боғча омборхонасида сақланаётган озиқ-овқат махсулотларидан намуналар олингани ҳам билдирилган.