Қўшма Штатлар Исроилга Фаластиннинг босиб олинган ҳудудларида яҳудий қишлоқларини қуришни тақиқловчи резолюцияга қарши чиқди. Резолюция лойиҳаси БМТ Хавфсизлик кенгашига муҳокама қилиш учун тақдим этилган эди.
France 24 хабарида айтилишича, резолюция қабул қилинишига қарши чиққан Вашингтон айни пайтда Исроилни Фаластиннинг босиб олинган ҳудудларида қишлоқлар қураётгани учун танқид қилишда давом этмоқда.
AFP агентлигининг билдиришича, БМТ Хавфсизлик кенгашига тақдим этилган резолюцияда «Фаластиннинг босиб олинган ҳудудларида барча ишларни тез ва тўлиқ тўхтатиш» талаб қилинган.
Мазкур резолюция лойиҳаси жаҳондаги йирик давлатлар, жумладан, АҚШ Исроилнинг Фаластиндаги ҳаракатларини танқид қилаётгани ортидан ишлаб чиқилган эди. Вашингтон сўнгги марта 16 февраль куни «Исроил ҳукуматининг Фаластинда қишлоқлар қуриш қароридан ҳафсаласи ўта пир бўлгани” тўғрисида баёнот берган эди.
Шу билан бир қаторда АҚШ Давлат департаменти Вашингтон Хавфсизлик кенгашида Исроилга қарши резолюцияни қўлламаслиги тўғрисида аниқ мужда берди. Бу резолюция лойиҳаси АҚШнинг иттифоқчиси бўлган Бирлашган Араб Амирликлари томонидан тайёрланган эди.
АҚШ бир неча ўн йилдан бери вето қўйиш ҳуқуқидан фойдаланган ҳолда Исроилни Хавфсизлик кенгаши резолюцияларидан ҳимоя қилиб келади. Фақат президент Барак Обама давридагина АҚШ Хавфсизлик кенгашида Исроилга нисбатан «бетараф» муносабатда эканини билдирган ва Исроил ҳукуматини Фаластиннинг босиб олинган ҳудудларида яҳудий қишлоқлари қуришни тўхтатишга чақирган.
France 24 таҳлилчилари президент Жо Байден маъмурияти Исроил бош вазири лавозимига қайта келган Бинямин Нетаняҳу билан яхши муносабатларни сақлаб қолмоқчи эканини ва айни пайтда Исроилни Фаластинда қишлоқлар қуриш сиёсатини танқид қилишда давом этаётганини айтмоқда.