АҚШ Конгрессига Ўзбекистон мустақиллиги ва суверенитетини дастаклашга оид резолюция кўриб чиқиш учун киритилган.
Конгресс сайтида билдирилишича, резолюцияда президент Шавкат Мирзиёевнинг мамлакатда инсон ҳақлари, сўз ва матбуот эркинлиги ҳамда эътиқод эркинлиги таъминланиши билан боғлиқ вазиятнинг яхшилашга қаратилган ислоҳотлар дастурининг аҳамияти қайд этилган.
Ҳужжатда Ўзбекистоннинг Марказий Осиё минтақасида иқтисодий жиҳатдан етакчи давлат сифатида ўсиб бораётган роли урғуланган ҳамда Афғонистондаги зиддиятни тинч йўл билан ҳал қилиш бўйича мамлакатнинг саъй-ҳаракати юқори баҳоланган.
Ҳозирнинг ўзида резолюцияни америкалик конгрессменлардан 10 нафари дастаклаган. Агар етарли овоз йиғолса, июнь ойи ўрталарида ҳужжат Намояндалар палатасида қабул қилинади.
Резолюция Ўзбекистон мустақиллигининг 30 йиллиги ҳамда бунинг АҚШ томонидан тан олинганига 30 йил тўлиши муносабати билан қабул қилиниши кутилмоқда.
Конгресс томонидан мазкур ҳужжатнинг қабул қилиниши АҚШнинг Ўзбекистон мустақиллиги, ҳудудий яхлитлиги ва суверенитетини дастаклаши ҳамда сўнгги йилларда мамлакатда муҳим сиёсий, иқтисодий ва ижтимоий ислоҳотлар содир бўлаётганини эътироф этишини англатади.
Резолюцияда конгрессменлар савдо, қишлоқ хўжалиги, энергетика, молиявий хизматлар, туризм, соғлиқни сақлаш ва рақамли инновациялар соҳаларида янги имкониятларни очиш учун Ўзбекистон расмийларини АҚШ билан иқтисодий ҳамкорликни янада чуқурлаштиришга чақирганлар.