АҚШ президенти Жо Байден ва Германия канцлери Олаф Шольц Россиянинг Украинага қарши тобора кучайиб бораётган агрессиясини муҳокама қилиш мақсадида 7 февраль куни Вашингтонда учрашишди, дея хабар қилди “Франс-пресс” агентлиги.
Музокаралар чоғида Жо Байден ушбу масалада АҚШ ва Германиянинг позициялари уйғунлигини айтган.
“Биз Европада Россия агрессиясини жиловлашда давом этиш, шунингдек Хитой томонидан юзага келтирилаётган муаммоларни ҳал қилиш учун бирликда ҳаракат қиламиз”, дея урғулаган Байден.
ГФР канцлери ўлароқ Оқ уйга илк бор ташриф буюрган Олаф Шольц икки мамлакат “энг яқин ҳамкорлар” экани ҳамда “қизғин муштарак фаолиятга тайёр”лигини айтган, шунингдек, Россия Украинанинг ҳудудий яхлитлигига рахна солган тақдирда унга қарши янги санкциялар жорий этишга шайлигини тасдиқлаган.
Германия лидери келгуси ҳафтада аввал Киевга, сўнгра Москвага бориши кутилмоқда.
Германиянинг янги ҳукумати Украина ва АҚШнинг айрим расмийлари тарафидан танқид қилинган. Берлин Россиянинг Украинага ҳарбий босимига қарши етарли даражада курашмаётганликда айбланган. Бунга Германиянинг Украинага қурол-аслаҳа жўнатмасликка оид қарори, шунингдек “Шимолий оқим-2” газ қувурини ишга туширишдан буткул воз кечишга тайёр эмаслиги сабаб бўлган. Газ қувури бўйича қарор қабул қилиш йўқ деганда 2022 йилнинг иккинчи ярмига қолдирилган.
Айни пайтда Украина чегаралари яқинида Россия 100 мингдан зиёд аскар тўплаган. Ғарб мамлакатлари Кремлни ҳарбий тажовуз режалаётганликда айбламоқда, Россия бу айбловларни бир неча бор рад этган.