АҚШ президенти Жо Байден 9 июль куни Россия раҳбари Владимир Путин билан телефон орқали мулоқот қилди. Оқ уй расмий баёнотига кўра, мулоқот чоғида томонлар ўз жамоаларининг АҚШ-Россия саммитидан сўнг Сурияга трансчегаравий инсонпарварлик ёрдамини етказиб бериш тикланишига олиб келган “ҳамкорликдаги саъй-ҳаракатларини юқори баҳолаганлар”.
“Америка овози”нинг хабар қилишича, Байден Путин билан Россиядаги кибержиноятчилар томонидан “ўғри” компьютер дастурлари ёрдамида ҳужум уюштириш давом этаётганига оид муаммони ҳам муҳокама қилган. Ушбу ҳужумлар Қўшма Штатлар ҳамда дунёнинг бошқа мамлакатларига дахл қилган.
“Президент Байден Қўшма Штатлар ушбу тўхтамаётган хатар қаршисида ўз халқини ва ўта муҳим инфратузилмаларини ҳимоя қилиш учун барча зарур чораларни кўришини тасдиқлади”, дейилган Оқ уй баёнотида.
Оқ уй матбуот котиби Жен Псаки 9 июль куни журналистларнинг саволларига жавоб бераркан, икки етакчининг телефон орқали мулоқоти АҚШ президенти Жо Байденнинг ташқи сиёсатда дипломатик воситаларга суянишини намойиш этишини таъкидлади.
Псакининг урғулашича, Америка раҳбарияти позициясига кўра Россия ҳукуматининг киберҳужумларга бевосита алоқаси бўлмаган тақдирда ҳам, кибертовламачилар Россия ҳудудида бемалол ҳаракат қилаётган экан, ҳукумат бунинг учун жавоб бериши керак.
Шу ҳафта бошларида АҚШ президенти “ўғри” дастурлар орқали ҳужумлар уюштириш давом этаётгани, уларнинг асосий нишони Kaseya технологик ширкати экани ва Америка бизнеси “минимал зарар” кўргани ҳақида айтган эди.
Мазкур ҳужумлар ҳакерларга дунё бўйича юзлаб майда корхона, жумладан АҚШ ширкатларининг тармоқдаги маълумотларини блоклашга имкон берган. Ҳужумлар учун жавобгарликни Россияга алоқадор бўлган REvil ҳакерлар гуруҳи ўз зиммасига олган.
Оқ уй матбуот котиби Жен Псаки президентларнинг жума кунги телефон орқали суҳбати бир соатга яқин давом этганини билдирган.