Аргентинанинг собиқ президенти ва амалдаги вице-президенти Кристина Киршнерга 1 сентябрь куни суиқасд уюштирилди, бироқ у жабрланмади, деб хабар берди Reuters. Уни ўлдирмоқчи бўлган шахс қўлга олинди. Ҳозирча суиқасдга ундаган сабаблар аниқ эмас.
Киршнерга Буэнос-Айресдаги уйи ёнида ўз тарафдорлари билан учрашаётган пайтда суиқасд қилинган. Тўппонча билан қуролланган шахс оломон ичида туриб вице-президентни мўлжалга олган. Бироқ тўппонча ишламай қолган, деб билдирди Todo Noticias телеканали.
Аргентина президенти Альберто Фернандес бу ҳаракатни “қотилликка уриниш” деб атади. Reuters агентлигининг ёзишича, президент тўппончада бешта ўқ бўлганини айтган.
Дастлабки маълумотларда ўқ отмоқчи бўлган шахс Бразилиянинг 35 ёшли фуқароси Фернандо Андреса Сабаг Монтьеля экани айтилмоқда.
Киршнер 2007 йилнинг декабридан 2015 йилнинг декабригача президент бўлган. Унга қадар унинг 2010 йилда вафот этган эри Нестор президент бўлган эди.
Аргентинада Киршнер коррупцияда айбланиб келади. Прокурор суддан Киршнерни 12 йилга озодликдан маҳрум этишни ва 1 миллиард доллар жаримага тортишни талаб қилмоқда.