Оқ Уй амалдаги президент Жо Байден 2024 йилда иккинчи муддат президентликка ўз номзодини кўрсатиш ниятида эканини билдирди.
22 ноябрь куни ўтган матбуот анжуманида Оқ Уй матбуот котиби Жен Псаки: “У курашишга тайёр. Бу унинг нияти”, -деб айтди.
79 ёшли демократ Жо Байден 2021 йил январида президентлик лавозимига киришганидан бери илк маротаба ўтган ҳафтада тиббий кўрикдан ўтказилди. Врачлар Байден ўз лавозимини бажариш учун етарли даражада соғлом эканини, аммо унинг ҳаракатланиши ва йўталиши билан боғлиқ муаммолар мавжудлигини қайд этган.
Сўнгги ойларда Байденнинг рейтинги кескин тушиб кетди ва бу амалдаги президент яна бир муддатга ўз номзодини кўрсатишига шубҳаларни пайдо қилди.
АҚШда президентлик ваколати икки муддат билан чекланган. 2020 йилдаги сайловда Байденга мағлуб бўлган 75 ёшли республикачи Дональд Трамп 2024 йилдаги сайловда ўз номзодини кўрсатиши ёки кўрсатмаслиги ҳақида ҳозирча маълум қилмади.