АҚШ президенти Жо Байден киберҳужумларга қарши кураш бўйича янги чора-тадбирларга оид баёнот билан чиқди. Бу ҳақда “Америка овози” хабар қилди.
Байденга кўра, киберхатарлар ҳар бир америкаликнинг манфаатига дахл қилмоқда. У АҚШ фуқароларини ҳимоя қилиш учун “комплекс чора-тадбирлар” кўрилаётганига урғу берган ҳамда киберхатарларга қарши курашдаги саъй-ҳаракати учун Адлия вазирлиги, ФТБ, Давлат департаменти ва Молия вазирлигига миннатдорлик билдирган.
АҚШ президенти ўз сўзида Россия билан муносабатларга ҳам тўхталган. У, жумладан, президент Путин билан июнь ойидаги учрашувини эслатган. Ўшанда Байден Россия президентини кибержиноятчиларни жавобгарликка тортиш учун АҚШ барча имконларни ишга солишидан огоҳлантирган.
Бир неча кун муқаддам АҚШ Давлат департаменти DarkSide ҳакерлар гуруҳи етакчилари шахсини ва манзилини аниқлашга ёрдам беражак маълумот учун 10 миллион доллар миқдорида мукофот берилишини эълон қилган эди.