АҚШ президенти Жо Байден Путин иқтидорда қолмаслиги кераклигига доир гапига изоҳ берди. Байденга кўра, бу сўзлар Қўшма Штатларнинг расмий позицияси эмас, балки унинг шахсий туғёни ифодаси бўлган.
“Мен битта сўзимни ҳам қайтариб олмайман. Бу Путиннинг хулқ-атвори ва хатти-ҳаракатларидан ғазабим ифодаси эди. Мен сиёсатдаги ўзгаришлар ҳақида ўшанда ҳам гапирмагандим, ҳозир ҳам ҳеч нима демайман. Айтган гапим учун узр сўрамайман”, деган Байден.
Жо Байден 26 март куни Варшавада сўзлаган нутқида Путин ҳокимиятда қололмаслигини айтган эди. Шундан сўнг Оқ уй “президент Россияда режим алмашишини эмас, қўшни минтақаларнинг Путин томонидан назорат қилинаётганини назарда тутган эди”, деган мазмунда изоҳ берган. АҚШ давлат котиби Энтони Блинкен эса Қўшма Штатларнинг расмий сиёсати ўзгармаслигини, Вашингтон Россияда ёки бошқа бирон мамлакатда режимни алмаштиришни кўзламаслигини билдирган.