Байден Варшавадаги нутқида демократия ва Украина билан бирдамлик ҳақида гапирди

“Дунё Киевнинг таслим бўлишига тайёрланган эди. Аммо Киев таслим бўлмади ва ҳар қачонгидан кўра кучлироқ”, деди АҚШ президенти Жо Байден 22 февраль куни кечқурун Варшавада сўзлаган нутқида.

Байден нутқ сўзлаши учун трибуна Варшавадаги Қироллик қасрига ўрнатилди. Уни тинглаш учун қўлларига Польша, АҚШ ва Украина байроқларини кўтариб олган минглаб одам йиғилди.

«Россия Украинага бостириб кирганида, бутун дунё синовга дучор бўлди. Бутун демократия таҳдид остида қолди. Биз оддий саволларга жавоб беришимиз шарт эди – кучимизни сақлаб қола оламизми ёки ожизлик қиламизми? Орадан бир йил ўтгач, биз жавобимизни биламиз – биз кучли эканимизни кўрсатдик ва бундан кейин ҳам суверенитет ва инсонларнинг агрессияга қаршилик кўрсатиш ҳуқуқи учун курашни давом эттирамиз”, деб таъкидлади Байден.

У ўз нутқи давомида АҚШ Украинани қанча керак бўлса шунча вақт дастаклашга тайёр эканини такрорлади ва НАТОдаги иттифоқчиларнинг қатъийлигини олқишлади.

Байден Украинадаги уруш ҳеч қачон Россия ғалабаси билан якунланишига ишонмаслигини қайд этди:

"Украина халқи ғалаба қилади, биз эса аввалгидек демократия ҳимоясида қолаверамиз. Украина ҳеч қачон Россиянинг қурбони бўлмайди, империяни қайта тикламоқчи бўлган диктатор эса инсонларнинг эркинликка бўлган муҳаббатини сўндира олмайди”, деди Байден.

АҚШ президенти ўз нутқида Россия армияси инсониятга қарши жиноятларни содир этаётганини қайд этди. Унга кўра, Россия армияси жинсий зўравонликни уруш қуроли сифатида қўлламоқда, вокзаллар, касалхоналар, мактаблар, меҳрибонлик уйларига зарбалар бермоқда. Байден Россия томонидан украин болаларининг ўғирланишини Украина келажагини ўғирлаш ҳаракати ўлароқ баҳолади.

Бундан аввалроқ АҚШ вице-президенти Камала Харрис ҳам Мюнхенда ўтган хавфсизлик анжуманида Россия армиясини украинада инсониятга қарши жиноятларни содир этганликда айблаган эди.

Байден Варшавадаги нутқида Россия фуқароларига ҳам мурожаат қилди. Унга кўра, Қўшма Штатлар Россияни вайрон қилмоқчи ёки ўз назоратига олмоқчи эмас. “Бу урушни президент Путиннинг ўзи танлади”, деди у Россиянинг Украинага босқинини назарда тутар экан.