Бошқа мамлакатларда туғилиб, яқин йилларда Россия фуқаролиги олган 350 дан зиёд киши армияга йўлланган. Бу ҳақда Baza телеграм-канали ўз манбаларидан олинган маълумотларга таянган ҳолда хабар қилди.
Сўнгги пайтларда полиция, ҳарбий комиссариат ва Тергов қўмитаси ходимлари Москва вилоятида жойлашган омборхоналар, қурилишлар ва фирмаларнинг офисларида яқинда фуқаролик олган, бироқ ҳарбий қайддан ўтмаган кишиларни излаб топиш учун рейдлар ўтказгани ҳақида мунтазам равишда хабарлар чиқиб турибди. Бундай рейдларда қўлга олинганлар полиция бўлимларига етказилиб, кейин ҳарбий комиссариатларга ўтказиб берилган.
Россия расмийлари мамлакат фуқаролигини олган мигрантларни Украина урушига жалб қилишга фаол ҳаракат қилмоқда. Россиянинг Санкт-Петербург ва Москва шаҳри дохил турли ҳудудларида уларни тутиш учун «облава»лар ўтказилган. Мигрантлар ҳатто масжидлардан ушлаб кетилиб, ҳарбий қайддан ўтказиляпти, уларга ҳарбий хизматга бориш учун шартномалар таклиф қилиниб, бундан бош тортилган тақдирда, жазоланишлари билан таҳдид қилинмоқда.
Ўз навбатида, Россия Тергов қўмитаси раҳбари Александр Бастрикин урушда иштирок этишни истамаганларни фуқароликдан маҳрум қилишни таклиф қилган. Бу каби чақириқлар бошқа қатор сиёсатчилар тилидан ҳам янграган.