Беларусь ҳуқуқни муҳофаза қилиш идоралари 9 июль куни бир неча журналистнинг уйи ва офисида тинтув ўтказди. Бу ҳақда ОАВ ва ҳуқуқ фаоллари хабар берган.
Брестда журналист Максим Хлец ва “Виртуалний Брест” портали маъмури Андрей Кухарчикларнинг уйларига милиция борган.
Беларусь журналистлари уюшмаси Витебск вилоятининг Глубокое шаҳрида журналист Татьяна Смоткинанинг уйига милиция келганини маълум қилган. Лунинецда “Информпрогулки” нашри таҳририятида, Ганцевичи шаҳрида эса “Ганцевичский час” газетаси офисида тинтув ўтказилган.
8 июль куни “Наша Нива” таҳририяти ҳамда ушбу нашр муҳаррирлари — Егор Мартинович, Андрей Скурко ва Андрей Динько, шунингдек бухгалтер Ольга Раковичнинг квартиралари тинтилган. Тинтувдан сўнг Мартинович ва Скурко 72 соатга ҳибсга олиниб, Минскнинг Окрестина кўчасидаги ҳибсхонага келтирилган. Tut.by телеграм-канали ёзишича, Мартинович қўлга олиш чоғида калтакланган ва у бошидан жароҳат олган.
Витебскда “Белсат” журналисти Дмитрий Казакевичнинг уйида тинтув ўтказилган. Тинтувга гўёки милиция ходимига туҳмат қилган номаълум шахсга қарши қўзғатилган жиноят иши сабаб бўлгани айтилмоқда. Бунга Казакевичнинг нима алоқаси борлиги очиқланмаган, аммо унинг уйидан ноутбуки, фотоаппарати ва оқ-қизил-оқ рангли байроқчаларни олиб кетганлар.
Ҳуқуқ фаоллари маълумотига кўра, 8 июль куни камида 14 нафар ОАВ ходими қўлга олинган.
Беларусда 2020 йилнинг август ойидан бери президент сайлови натижалари сохталаштирилганига қарши норозилик чиқишлари ўтказилмоқда. Намойишлар чоғида милиция таҳририят топшириғига кўра воқеаларни ёритаётган бир неча журналистни қўлга олган.