Александр Лукашенко “Улуғ Ватан уруши йилларида ва урушдан кейин 1951 йилгача Беларусь халқининг геноцид қилиниши тўғрисида”ги қонунни имзолади. Бу ҳақда республика раҳбарининг расмий сайти маълумот тарқатди.
“Қонун Улуғ Ватан уруши натижалари нотўғри талқин қилинишининг олдини олишга, шунингдек беларус жамиятини жипслаштиришга ёрдам беради”, дейилган хабарномада.
“Улуғ Ватан уруши ва урушдан кейинги даврда” беларуслар геноцид қилинганини омма олдида, жумладан интернетда инкор этиш, ушбу қонунга мувофиқ, ҳибсга олиш, беш йилгача озодликни чеклаш ёки озодликдан маҳрум этиш билан жазоланади.
Шу модда билан илгари судланган ёки мансабдор шахслар такроран мазкур жиноятни содир этган тақдирда уч йилдан ўн йилгача қамоқ муддати тайинланади.
Қонунда беларус халқининг Улуғ Ватан йилларида геноцид қилиниши тушунчасига таъриф берилган: бу “уруш даврида ва ундан кейинги йилларда нацистлар ва миллатчи ташкилотлар томонидан содир этилган ёвузликлар” бўлиб, бундан кўзланган мақсад “беларус халқини режали равишда жисмонан йўқ қилиш” бўлган.
Ҳужжатда қонун лойиҳаси “Улуғ Ватан уруши йилларида ва урушдан кейинги даврда қурбон бўлган миллионлаб совет фуқаролари хотирасини сақлаш мақсадида” ишлаб чиқилга ва “беларус халқининг тамал қадриятлари муҳофазасини қонун билан таъминлаш, Иккинчи жаҳон уруши натижаларини сохталаштиришга уринишлар йўлига таъсирчан тўсиқлар қўйишга қаратилган”и айтилган.